Potter: Ég er ákaflega ánægður hérna

„Við tókum stig og vorum afskaplega ánægðir með frammistöðu okkar á Stamford Bridge. Chelsea er eitt besta lið heims. Þetta er ein erfiðasta áskorunin í boltanum en við erum spenntir fyrir leiknum," segir Graham Potter stjóri Brighton.

Hann reiknar með rólegum janúarglugga hjá sínu félagi.

„Maður er alltaf á tánum í janúarglugganum en það er engin örvænting hjá okkur. Mitt starf er að einbeita mér að leikjunum og hjálpa þeim leikmönnum sem við erum með. Ég sé ekki að neinn bætist við en maður útilokar ekkert."

Brighton verður án Shane Duffy sem er meiddur á ökkla og þá er Lewis Dunk ekki alveg klár í slaginn og spilar ekki. Adam Lallana spilar líklega ekki vegna meiðsla aftan í læri.

Graham Potter er einn af þeim sem hefur verið orðaður við stjórastarfið hjá Everton.

„Það eru ekki gleðifréttir þegar einhver missir starfið sitt. Rafael Benítez virkaði á mig sem sannur herramaður og ég óska honum alls hins besta. Ég get ekki tjáð mig um vangaveltur. Ég er ákaflega ánægður hérna, þetta er eitt best rekna félag úrvalsdeildarinnar," segir Potter.