- Fram og Keflavík vonast eftir efri hlutanum
Fram og Keflavík mætast innbyrðis vitandi það að sigur getur gefið miða í efri deildina. Liðin eru þremur stigum á eftir Stjörnunni sem nægir jafntefli gegn FH til að tryggja sér sæti í efri hlutanum. Það verður sótt til sigurs í Úlfarsárdalnum!

- Eykst pressan í Garðabænum?
'No comment' segja menn í Garðabænum um þær slúðursögur sem hafa verið í gangi varðandi þjálfaramál félagsins. Eftir öfluga byrjun á tímabilinu hefur Stjarnan tapað fimm leikjum í röð og það yrði harkalegur skellur fyrir liðið ef það tapar gegn FH og missir mögulega af efri hlutanum.

- Gummi getur færst nær gullskónum
Nökkvi Þeyr Þórisson er búinn að yfirgefa deildina, hann er markahæstur með 17 mörk en Guðmundur Magnússon í Fram er með 14. Gummi getur færst nær gullskónum gegn Keflavík en Ísak Snær Þorvaldsson í Breiðabliki, sem er með 13 mörk, tekur út leikbann og spilar ekki gegn ÍBV.

- Arnar Grétars mætir liðinu sem hann er orðaður við
Taldar eru litlar líkur á því að Ólafur Jóhannesson verði áfram með Val eftir tímabilið og Heimir Hallgrímsson er ekki lengur möguleiki fyrir Val. Arnar Grétarsson, þjálfari KA, hefur verið sterklega orðaður við starfið á Hlíðarenda og viðurkennir sjálfur að hugur sinn leiti suður. Valur gegn KA, Óli Jó gegn Arnari. Áhugavert.

- Ísakslausir Blikar geta styrkt stöðuna á toppnum
Ísak Snær verður í banni þegar Breiðablik mætir ÍBV. Markalaust var í viðureign þessara liða á loðnum Hásteinsvelli fyrr á tímabilinu en nú er það rennislétt gervigrasið í Kópavogi. Víkingar eiga erfiðan leik gegn KR og möguleiki fyrir Blika að styrkja stöðu sína á toppi deildarinnar umtalsvert.

- Alltaf fjör og læti þegar Víkingur mætir KR
Maður fær vatn í munninn þegar þessi lið mætast, sama þó Sölvi og Kári séu ekki lengur innan vallarins. KR-ingar, sem innsigluðu sæti í efri hlutanum um síðustu helgi, eru særðir eftir 0-3 tap í deildinni fyrr í sumar og bikarleikinn magnaða þar sem allt stefndi í framlengingu þegar Víkingar tryggðu sér sigur í blálokon.

- Botnliðin berjast
Síðast en ekki síst. Liðin í fallsætunum eigast við á Akranesi; ÍA - Leiknir. ÍA er í neðsta sæti eftir að hafa fengið skell gegn FH í síðustu umferð og mætir Leikni í öðrum innbyrðis fallbaráttuslag. Breiðhyltingar eiga möguleika á því að koma sér upp úr fallsæti með sigri og hagstæðum úrslitum. Það kæmi manni á óvart ef eitthvað verður gefið eftir á Skaganum.