Síðustu umferð ensku úrvalsdeildarinnar fyrir landsleikjahlé er nýlokið og er Garth Crooks hjá BBC búinn að velja lið umferðarinnar. Hann velur ekki aðeins leikmenn sem spiluðu í deildinni heldur líka í bikarnum þar sem Wolves sló Manchester United út í 8-liða úrslitum á meðan Manchester City komst naumlega áfram gegn Swansea.
Markvörður - Kristoffer Nordfeldt (Swansea): Valinn í lið vikunnar þrátt fyrir að fá þrjú mörk á sig í bikarnum. Svíinn átti stórleik og var ástæðan fyrir því að Swansea komst nálægt því að slá Man City úr leik.
Varnarmaður - Wes Morgan (Leicester): Fyrirliðanum var skipt inn í upphafi leiks eftir að Harry Maguire fékk beint rautt spjald. Hann átti stórleik gegn Burnley og skoraði sigurmark leiksins.
Varnarmaður - Conor Coady (Wolves): Hélt Marcus Rashford í skefjum og var eins og klettur í hjarta varnarinnar er Úlfarnir unnu sér inn sæti í undanúrslitum enska bikarsins í fyrsta sinn á þessari öld.
Varnarmaður - James Milner (Liverpool): Kom af bekknum í síðari hálfleik og hafði mikil áhrif á leikinn gegn Fulham. Það er alltaf hægt að treysta á Milner og gerði hann sigurmarkið úr vítaspyrnu.
Miðjumaður - Raheem Sterling (Man City): Kom inn af bekknum er City var 2-0 undir gegn Swansea og bætti nýrri vídd við sóknarleik Englandsmeistaranna. Sterling er orðinn einn besti leikmaður enska boltans og sýndi það aftur á laugardaginn.
Miðjumaður - Bernardo Silva (Man City): Átti stórleik um helgina þar sem hann skoraði fyrsta mark City og lagði sigurmarkið síðan upp. Bernardo virðist verða betri með hverjum leiknum og er búinn að spila 40 leiki á tímabilinu.
Miðjumaður - James Maddison (Leicester): Gríðarlega mikilvægur í sóknarleiknum er 10 leikmenn Leicester höfðu betur gegn Burnley. Maddison skoraði laglegt aukaspyrnumark og skapaði þrjú marktækifæri.
Miðjumaður - Joshua King (Bournemouth): Skoraði bæði mörkin í 2-2 jafntefli gegn Newcastle. Norðmaðurinn hefur verið öflugur á tímabilinu og er kominn með ellefu mörk í úrvalsdeildinni.
Framherji - Sadio Mane (Liverpool): Það getur enginn stöðvað Mane um þessar mundir, hann skorar í nánast hverjum einasta leik. Hann skoraði fyrra markið gegn Fulham, átti skot í slá og fiskaði vítaspyrnu.
Framherji - Raul Jimenez (Wolves): Þvílíkt tímabil hjá þessum kappa en hann skoraði mikilvægt mark er Úlfarnir slógu Manchester United úr bikarnum á laugardaginn. Jimenez átti góðan leik og þá sérstaklega fyrir vinnuframlag sitt en hann djöflaðist í öftustu línu Rauðu djöflanna eins og enginn væri morgundagurinn.
Athugasemdir