Bosníski markvörðurinn Asmir Begovic mun vera áfram hjá Everton á næstu leiktíð eftir að félagið nýtti ákvæði í samningi hans til að framlengja um eitt ár.
Begovic er 34 ára varamarkvörður fyrir Jordan Pickford og hefur spilað sex leiki á yfirstandandi tímabili, þar af tvo í ensku úrvalsdeildinni. Í öðrum þeirra hélt hann hreinu gegn Newcastle en í hinum skoraði Aston Villa þrisvar hjá honum.
Everton mun þó ekki endilega spila í efstu deild á næstu leiktíð þó að útlitið sé ansi bjart eftir frábær úrslit úr erfiðum leikjum.
Lærisveinar Frank Lampard eru tveimur stigum fyrir ofan Burnley í fallsæti og einu stigi fyrir ofan Leeds sem er búið að spila einum leik meira.
Begovic hefur meðal annars leikið fyrir Portsmouth, Stoke, Chelsea og AC Milan á sautján ára ferli. Hann gekk í raðir Everton á frjálsri sölu í fyrrasumar.
Athugasemdir
