Það er óumdeilanlegt að Casemiro hefur verið með bestu varnarsinnuðu miðjumönnum heims síðasta áratuginn eða svo og myndað magnað tríó á miðsvæðinu með Toni Kroos og Luka Modric. Á þessum tíma hefur hann unnið Meistaradeildina fimm sinnum.

Hann er nú orðinn þrítugur og eru nú kostir Madrídinga ansi margir á miðsvæðinu. Félagið fékk Aurélien Tchouaméni frá Mónakó í sumar en árið áður kom Eduardo Camavinga frá Rennes.

Eins mikilvægur og hann hefur verið í gegnum árin er hann ekki talinn stórkostlega mikilvægur lengur og er félagið reiðubúið að hlusta á tilboð í hann en Manchester United hefur gríðarlega mikinn áhuga á að fá hann í glugganum.

Madrídingar telja það skynsamlegt að leyfa honum að fara og lækka launakostnaðinn en hvort Casemiro hafi áhuga á því að spila í Evrópudeildinni er annað mál. Hann myndi tvöfalda laun sín hjá United og fá hátt í 300 þúsund pund í vikulaun, en það hefur sárvantað varnarsinnaðan miðjumann í hópinn.

United þyrfti að greiða um 60 milljónir punda til að landa Casemiro í glugganum en ákvörðun liggur nú hjá honum.