Þetta staðfesti félagið nú í kvöld en um er að ræða 24 ára gamlan Norðmann sem gerir samning út sumarið.

Pettersen lék með ÍR í Lengjubikarnum gegn Víði í dag og skoraði annað mark liðsins í 2-0 sigri.

Miðjumaðurinn lék síðast með Kvik Halden í norsku þriðju deildinni og hefur verið á reynslu hjá ÍR síðan í byrjun mars.

„Jörgen er týpa sem okkur vantaði í liðið, skapandi miðjumaður sem er góður skotmaður. Rólegur og yfirvegaður leikmaður sem tekur góðar ákvarðanir, enda er hann stærðfræðingur að mennt. Hann á mjög mikið inni sem leikmaður. Hann hefur ekki fengið frábæra þjálfun sýnist mér en náttúrulegir hæfileikar og innsæi í leikinn leyna sér ekki," segir Arnar Hallsson, þjálfari ÍR, um leikmanninn.

„Ég er vongóður um að við náum að laða það besta fram í Jörgen á næstu mánuðum og að hann muni styrkja okkur umtalsvert þegar hann hefur komist inn í okkar leikstíl og áherslur. Hann var mjög áhugasamur um að ganga til liðs við okkur og er alveg einstaklega viðkunnalegur ungur maður sem mun falla vel inn í hóp þeirra leikmanna sem fyrir eru hjá okkur."

ÍR hafnaði í níunda sæti 2. deildarinnar í fyrra og mun stefna að því að gera betur þegar deildin hefst á ný.