„Þetta er risa leikur, fyrir Breiðablik, risa leikur fyrir íslenskan fótbolta," sagði Halldór Árnason þjálfari Breiðabliks á fréttamannafundi í dag, fyrir leik þeirra gegn Virtus frá San Marínó í loka umferð undankeppni Sambandsdeildarinnar.
„Við erum mjög vel undirbúnir og klárir að spila fyrri leikinn í þessu einvígi á morgun," sagði Halldór
Breiðablik eru sigurstranglegri fyrir leikinn og Halldór segir að honum finnist hann vera með betra liðið.
„Við erum reynslumeiri á þessu sviði, en á sama skapi þá eru þeir ekki þarna fyrir tilviljun. Þeir slá út meistara lið frá Moldóvu með því að vinna þá 3-0 í síðasta leik. Það er engin heppni eða tilviljun. Þeir eru bara lið frá landi, líkt og Ísland, sem átti sér draum um að vera í riðlakeppni fyrir einhverjum árum sem var kannski óraunhæft. Það hefur breyst með þessu breyttu 'formati' í Evrópu. Þeir eru kannski á sama stað og íslensku liðin fyrir tveim til þrem árum, að ætla sér að skrifa söguna og vera fyrsta liðið til að tryggja sér í Evrópu. Þeir eru með mjög reynslumikið lið, hægt að segja gamalt lið. Mjög mikið af reynslumiklum leikmönnum sem kannski eru þarna, og ekki í b-deildinni á Ítalíu, því þeir hafa tækifæri að spila í Evrópu og upplifa draum um að spila í deildarkeppni í Evrópu áður en ferlinum lýkur. Þetta er bara fínasta lið og muna auðvitað mæta hérna til að hægja á leiknum, ná í úrslit, og fara með heim. Þannig að við erum reynslumeiri og ég tel okkur vera með betra lið, en það er enginn að fara gefa okkur neitt. Þeir eru ekki að fara leggjast hérna og láta pakka sér saman, það er algjörlega ljóst," sagði Halldór.
Virtus liðið er með þónokkra leikmenn í stórum hlutverkum sem eru orðnir mjög gamlir í fótbolta aldri. Breiðablik gæti því nýtt sér orkuna í yngri leikmönnum sem þeir hafa líkt og þeir gerðu gegn Egnatia.
„Það er hægt að gera það á annan hátt. Egnatia menn komu mjög hugrakkir inn í leikinn á móti okkur og ætluðu að pressa okkur út um allan völl maður á mann. Þeir kannski vanmátu Breiðablik á Kópavogsvelli þegar við gerum hlutina vel og hratt. Þetta verður allt öðruvísi leikur á morgun, þeir liggja mjög neðarlega og verja markið sitt neðarlega á vellinum. Við þurfum að spila hratt, við þurfum að vinna boltann hratt eftir að við töpum honum og halda þeim neðarlega á vellinum. Passa að þeir fái ekki súrefni til að koma sér inn í leikinn og líði eins og þeir fari að gera eitthvað. Ef við erum að tala um Egnatia þá er þetta allt önnur sviðsmynd, en já við þurfum mjög orkumikla frammistöðu, það er alveg ljóst," sagði Halldór.
Það hefur heyrst í einhverjum stuðningsmönnum Breiðabliks gagnrýna Óla Val Ómarsson og leikkerfið sem Blikar spiluðu í síðasta Evrópu leik. Halldór gefur ekki mikið fyrir þessa gagnrýni..
„Ég veit ekki hvað það eru margir Blikar, mögulega 25 þúsund manns sem halda með Breiðablik. Ef þú talar við þá alla og segir mér hversu margir eru sammála þeim þá skal ég skoða það. Ég bara vona að einhver gefi þeim gott knús heima," sagði Halldór.
