Mac Allister: Það var ekki allt með felldu innan hópsins

Mac Allister hefur byrjað tímabilið af miklum krafti eftir að hafa átt erfitt uppdráttar á síðasta tímabili.

Hann skoraði tvö mörk í 4-3 sigri Liverpool á Villarreal í kvöld. Það fyrra kom með laglegum skalla og það síðara þegar hann hamraði boltanum í slána og inn af stuttu færi.

Miðjumaðurinn var sérstaklega ánægður með frammistöðu hins 18 ára gamla Rio Ngumoha, sem lagði upp tvö mörk í leiknum, þar á meðal seinna mark Mac Allister.

„Þetta var alls ekki auðveldur leikur. En sjáið bara Rio, hann var stórkostlegur í kvöld. Hann skipti sköpum fyrir okkur og ég er mjög ánægður fyrir hans hönd.“

„Hann býr yfir ótrúlegum hæfileikum. Það vita allir og það er auðvelt að tala um hversu góður hann er með boltann, en það er annað sem skiptir líka máli. Hann lagði til dæmis gríðarlega mikið á sig án boltans.“

Mac Allister var einnig spurður út í mörkin sín tvö og þá sérstaklega skalla hans í fyrri hálfleik.

„Ég er ekkert sérstaklega hávaxinn en elska að fara inn í teiginn. Strákarnir vita að mér finnst gaman að ráðast á nærstöngina. Ég gerði það líka á HM í sumar og þetta var góður skalli.

„Í seinna markinu var þetta stórkostlega gert hjá Rio. Ég hafði talað við hann um að senda boltann fastan með jörðinni inn í teiginn og hann gerði nákvæmlega það.

„Þetta er ekkert sem ég æfi sérstaklega. Pabbi minn er aðeins minni en ég en hann var nokkuð góður í loftinu, þannig að ætli ég hafi ekki fengið þetta frá honum.“

Mac Allister ræddi einnig síðasta tímabil undir stjórn Arne Slot, en Hollendingurinn var rekinn í sumar og Andoni Iraola tók við liðinu. Að sögn Mac Allister var ekki allt eins og það átti að vera innan Liverpool-hópsins á síðasta tímabili.

„Síðasta tímabil var mjög erfitt fyrir okkur. Við vorum ekki upp á okkar besta og ég er fyrstur til að viðurkenna það. Það var ekki allt með felldu innan hópsins en þessi stjóri hefur náð að breyta því.“

„Við spilum öðruvísi núna, þó að ég vilji ekki endilega vera að bera þetta saman. Mér líður hins vegar vel með hvernig við erum að spila.“

„Núna er þetta meira maður á mann og við þurfum ekki að tala jafn mikið saman á vellinum. Á síðasta tímabili var þetta meira svæðisbundið. Mér líkar hvort tveggja og við spilum til dæmis svæðisvörn með landsliðinu, sem virkar mjög vel.“

„Þetta snýst fyrst og fremst um að hver og einn taki ábyrgð. Það er ein af breytingunum. Núna er þetta einfaldara, maður þarf að hugsa minna en hlaupa meira.“

Samningur Mac Allister við Liverpool rennur út eftir tímabilið, en hann greindi frá því í viðtali á dögunum að hann væri sorgmæddur yfir því að félagið hefði tjáð honum að það væri ekki í aðstöðu til að bjóða honum nýjan samning að svo stöddu.

Síðan þá hefur hann verið frábær og virðist staðráðinn í að sýna að hann eigi skilið nýjan samning.

„Þegar ég sagði þetta á sínum tíma var ég að tala út frá tilfinningunum. Þetta er ákvörðun félagsins og ég sætti mig við hana. Ég ætla bara að halda áfram að gera mitt besta og svo sjáum við hvað gerist.“

Mac Allister hafði einnig mikið lof um Iraola og þá breytingu sem hann hefur komið á hjá Liverpool.

„Strax á fyrsta degi sá ég eitthvað sérstakt við hann. Hann er frábær náungi og það sama má segja um allt þjálfarateymið. Við erum á réttri leið en þurfum að halda áfram að vinna hörðum höndum og leggja allt í sölurnar. Vonandi tekst okkur að vinna einhverja titla,“ sagði Argentínumaðurinn.