Arteta svaraði ásökunum Souness

Souness sakaði leikmenn Arsenal um að setja pressu á dómara til að fá brot dæmd og sagði Saka stunda leikaraskap með því að kasta sér í grasið og öskra eftir aukaspyrnum.

Arteta var spurður út í ummæli Souness á fréttamannafundi en vildi ekki láta draga sig inn í umræðuna.

„Ég hef ekki heyrt þessi ummæli og ætla ekki að tjá mig um skoðanir annarra. Við erum opnir fyrir gagnrýni, það er hluti af starfinu og því hlutverki sem við gegnum. Það ber að virða skoðanir fólks, sérstaklega þegar þær eru settar fram af virðingu.“

„Við erum hér til að sýna að við eigum heima á þessu stigi og að við höfum viljann og metnaðinn til að halda áfram að bæta okkur. Það er allt og sumt,“ sagði Arteta.

Síðar á fréttamannafundinum var Arteta spurður út í mun jákvæðari ummæli, en því hafði verið haldið fram að Ezri Konsa og Gabriel væru besta miðvarðapar heims um þessar mundir.

„Þetta er frábær skoðun! Í mínum augum eru leikmennirnir mínir þeir bestu í heimi og mér finnst ótrúlegt hversu vel þeir hafa náð saman á svona stuttum tíma.“

„Ég verð að hrósa þeim báðum og liðinu öllu, en á sunnudaginn voru þeir stórkostlegir þegar mest á reyndi,“ sagði Arteta.