Lengjudeild kvenna: HK skemmdi endurkomupartý Söru Bjarkar

Haukar og HK áttust við í Lengjudeild kvenna fyrr í kvöld og byrjuðu heimakonur talsvert betur. Haukar fengu frábær færi á fyrstu 25 mínútunum en eftir það náðu HK völdum á vellinum og sköpuðu góð færi í afar kaflaskiptum fyrri hálfleik. Sara Björk Gunnarsdóttir var í byrjunarliði Hauka í endurkomuleik sínum eftir langa fjarveru úr íslenska boltanum.

Hvorugu liði tókst að skora svo staðan var markalaus í leikhlé. Í síðari hálfleik byrjuðu Haukar aftur betur en HK náði svo tökum á leiknum, líkt og hafði gerst í fyrri hálfleik.

Á lokakaflanum náði fyrirliðinn Valgerður Lilja Arnarsdóttir forystunni fyrir HK þegar hún fylgdi skallatilraun frá Henríettu Ágústsdóttur eftir og skömmu síðar tvöfaldaði Henríetta sjálf forystuna með mögnuðu skoti úr miðjuboganum. Viktoría Sólveig Óðinsdóttir var komin alltof langt út úr marki Hauka svo hún átti aldrei séns í þennan bolta, sem endaði rétt undir samskeytunum.

Haukum tókst ekki að minnka muninn svo lokatölur urðu 0-2 fyrir HK eftir að gestirnir úr Kópavogi skoruðu tvö mörk með stuttu millibili á lokakafla leiksins til að skemma endurkomupartý Söru í Hauka.

Liðin eru jöfn með 17 stig eftir þessa innbyrðisviðureign en Haukar eiga leik til góða.

TENGT EFNI24.07.26 - 18:34

Sara Björk byrjar sinn fyrsta leik fyrir uppeldisfélagið í 18 ár