England: Liverpool ekki í erfiðleikum gegn Arsenal

Liverpool tók á móti Arsenal í stórleik dagsins í ensku úrvalsdeildinni og var gæðamunur liðanna augljós.

Heimamenn hefðu hæglega getað verið búnir að skora áður en Joel Matip skallaði hornspyrnu frá Trent Alexander-Arnold í netið. Gestirnir áttu fínar rispur og var Nicolas Pepe líflegur.

Mohamed Salah skoraði úr vítaspyrnu í upphafi síðari hálfleiks og gerði svo út um viðureignina með laglegu einstaklingsframtaki á 59. mínútu.

Lucas Torreira minnkaði muninn á 81. mínútu en nær komust gestirnir ekki og verðskuldaður 3-1 sigur Liverpool staðreynd.

Liverpool er með fullt hús stiga eftir þrjár umferðir á meðan Arsenal situr eftir með sex stig.

Arsenal á erfiðan leik gegn Tottenham í næstu umferð á meðan Liverpool heimsækir Burnley.

Markmið Liverpool á tímabilinu er að vinna deildina á meðan markmið Arsenal er að ná Meistaradeildarsæti.