Iraola: Við treystum honum

Liðsval Iraola kom nokkuð á óvart, en hann ákvað að setja hinn 19 ára gamla Nyoni í byrjunarliðið á miðjunni í stað Ryan Gravenberch.

Nyoni stóð sig vel gegn Chelsea í deildabikarnum og fær nú traustið á enn stærra sviði.

„Þetta er stórleikur. Leikjadagskráin er þétt og það er lítill tími til stefnu þegar maður þarf að undirbúa næsta leik á aðeins tveimur eða þremur dögum. Í dag er hins vegar sannkallaður stórleikur og við verðum að vera upp á okkar besta.“

„Við komum inn í þennan leik með þrjá heimasigra í röð. Við þurftum á þessum sigrum að halda og viljum nú ljúka þessari hrinu með stórum sigri.“

Iraola útskýrði síðan hvers vegna Nyoni varð fyrir valinu.

„Hugsunin er einfaldlega sú að hann hefur verið að spila vel og við treystum honum. Hann hefur góða stjórn á boltanum, skilur leikinn vel og er klókur þegar kemur að því að leysa flóknar aðstæður án bolta.“

„Hann er góður í þessum þáttum og við verðum líka að hafa í huga að við eigum öfluga varamenn sem geta komið inn í síðari hálfleik. Þetta gefur okkur góða möguleika og við treystum því að hann standi sig vel.“

Dominik Szoboszlai er til taks á varamannabekknum eftir að hafa verið frá vegna meiðsla undanfarnar vikur.

„Hann vildi ólmur byrja leikinn. Eftir leikinn gegn Brentford fórum við aðeins of geyst af stað með hann og höfum því farið varlega síðan. Hann þarf að fylgja ákveðnu ferli í dag og mun líklega koma við sögu í síðari hálfleik.“

Iraola var að lokum spurður hverju hann byggist við frá stuðningsmönnum Liverpool á Anfield.

„Því sama og þeir gefa okkur í hvert einasta sinn. Við verðum að nýta okkur forskotið sem þeir veita okkur,“ sagði Iraola.