Norwich búið að skora þrjú mörk í síðustu 19 úrvalsdeildarleikjum

Norwich er aðeins búið að skora tvö mörk á deildartímabilinu og fá 23 á sig sem verður að teljast merkilega slakur árangur.

Sparkspekingar tóku þá að skoða tölfræði Norwich í ensku úrvalsdeildinni og í ljós kom að liðið hefur aðeins skorað þrjú mörk í síðustu 19 úrvalsdeildarleikjum sínum.

Norwich var síðast í úrvalsdeildinni tímabilið 2019-20 og endaði í langneðsta sæti með 21 stig. Þar gekk liðinu sérstaklega illa undir lokin og tókst aðeins að skora eitt mark í síðustu tíu deildarleikjunum fyrir fall.

Norwich fór beint aftur upp í úrvalsdeildina en virðist vera á leið niður eftir hrikalega byrjun.

Félagið er búið að tapa 17 af síðustu 19 úrvalsdeildarleikjum sínum og gera 2 jafntefli.