„Auðvitað gott að vinna, svekkjandi að það hafi ekki verið stærra. mér fannst við gera nóg til þess og já, nokkur atvik sem ég er ósáttur með og hefði viljað fara með stærri forystu út“ sagði Guðmundur Kristjánsson, fyrirliði Stjörnunnar, eftir 2-1 sigur gegn Paide í 2. umferð forkeppni Sambandsdeildarinnar í kvöld.
Lestu um leikinn: Stjarnan 2 - 1 Paide
Stjarnan fór með 1-0 forystu inn í hálfleikinn en Paide jöfnuðu leikinn á 55. mínútu úr vítaspyrnu. Aðspurður hvernig honum hafi liðið á þeim tímapunkti segir hann:
„Mér leið þokkalega vel. Mér leið eins og við værum á degi þar sem við værum alltaf að fara að klára þetta. Svona kemur fyrir en við hefðum átt að skora fleiri mörk og taka með okkur stærri forystu það er stóra málið í þessu en við vinnum leikinn það er jákvætt, við viljum bara meira.“
Í vikunni talaði Jökull Elísabetarson, þjálfari Stjörnunnar, um að hann teldi liðið renna nokkuð blint í sjóinn varðandi gæði andstæðinganna en hvernig upplifði Gummi þá í leiknum?
„Mér fannst þeir byrja ágætlega svo fannst mér við ná tökum á leiknum. Svo fannst mér þeir fara að falla aftar og mér fannst við taka öll völd. Eins og ég segi, við skorum mark sem er dæmt af sem ég þarf eiginlega að fá að sjá aftur af því mér fannst það mjög skrýtið og fannst við eiga að fá víti líka og svona en varðandi styrkleikann þá er þetta klárlega lið sem að við getum unnið.“
Viðtalið við Gumma má sjá í heild sinni í spilaranum hér fyrir ofan.