Evrópska knattspyrnusambandið UEFA hefur hafið rannsókn á meintri rasískri hegðun landsliðsmanns Svartfjallalands sem tapaði heimaleik gegn Finnlandi í gærkvöldi.
Svartfellingar voru ekki sáttir með dómgæsluna í leiknum og voru fimm gul spjöld farin á loft gegn Svartfellingum á fyrstu 25 mínútunum. Þar á meðal var Zarko Tomasevic rekinn af velli með tvö gul.
Staðan var enn markalaus eftir hálftíma af leiknum en þá reiddist Glen Kamara, hörundsdökkur landsliðsmaður Finnlands, eftir orðaskipti við leikmann Svartfellinga.
„UEFA hefur hafið rannsókn á rasískri hegðun landsliðsmanns Svartfjallalands í garð Glen Kamara. Finnska knattspyrnusambandið og finnska landsliðið hafa ekkert um málið að segja að svo stöddu," segir í yfirlýsingu finnska knattspyrnusambandsins.
Finnland vann leikinn 0-2 og dæmdi um leið Ísland til að sitja eftir í þriðja styrkleikaflokki fyrir dráttinn fyrir undankeppni EM. Ísland stefndi á að komast í 2. styrkleikaflokk og sleppa þannig við að mæta stórþjóðum á borð við Frakklandi og Englandi í riðlinum.
