Efnilegust 2026 - Bætti sig ekki bara í fótbolta

TENGT EFNI27.10.26 - 12:20

Úrvalslið ársins í Bestu deild kvenna 2026

Líf, sem er fædd árið 2007, var ein af þeim ungu leikmönnum sem tóku stærra hlutverk í liði Breiðabliks í sumar og hún tók það af miklum krafti. Gríðarlega fjölhæfur leikmaður sem getur spilað út um allan völl en hún spilaði í sumar sem hægri og vinstri vængbakvörður, sem kantmaður, sem tía og líka sem sóknarmaður. Hún leysti öll þessi hlutverk vel og kom að tíu mörkum fyrir Blikaliðið sem varð Íslandsmeistari. Hún spilaði þá sinn fyrsta A-landsleik á dögunum.

„Mér fannst hún mjög sjaldan eiga vonda leiki. Það kom auðvitað fyrir að hún var ekki frábær, en það er bara eðlilegt. Ástæðan fyrir því að ég vel hana er að mér fannst hún alltaf vera að bæta sig," sagði Arnar Páll Garðarsson.

„Mér fannst hún vera að spila sinn besta fótbolta undir lok tímabilsins og hún hafði verið góð fram að því. Mér fannst hugarfarið breytast hjá henni og maður sér það inn á vellinum. Mér fannst ég sjá mun á öllu og auðvitað kemur landsliðið á fáránlega góðum tíma fyrir hana og Breiðablik. Ása tók smá dýfu og var óheppin fyrir framan markið, sama hjá Ingibjörgu. Mér fannst ég aldrei geta sagt að Líf hafi verið léleg þrjá leiki í röð. Það var alltaf orka og hún var alltaf að reyna."

„Það er gaman þegar maður sér líka ekki bara bætingu í fótbolta, heldur líka á hugarfari."

Snæbjört Pálsdóttir tók undir þetta. „Hún var ógeðslega flott. Og þetta hugarfar líka. Maður sér oft með unga leikmenn sem vilja spila sína stöðu og ekkert fara út úr henni. Henni var hent í allar stöður og gerði það að sínu," sagði hún.

Hægt er að hlusta á alla umræðuna í spilaranum hér fyrir neðan.

TENGT EFNI27.10.26 - 13:00

Best 2026 - Alltaf að sýna nýjar hliðar á sér