Það sem U21 þarf að gera til að komast í umspil

Íslenska liðið er með tólf stig úr átta leikjum með þrjá sigra, þrjú jafntefli og tvö töp.

Staðan í riðlinum er svona:
1. Frakkland - 17 stig
2. Sviss - 17 stig
3. Færeyjar - 12 stig
4. Ísland - 12 stig
5. Lúxemborg - 4 stig
6. Eistland - 2 stig

Strákarnir byrjuðu undankeppnina á 1-2 tapi gegn Færeyjum heima í september á síðasta ári og fylgdu því eftir með jafntefli gegn Eistlandi úti þar sem Benoný Breki Andrésson bjargaði stigi undir lokin.

Eftir það gerðu strákarnir jafntefli við Sviss úti og unnu Lúxemborg tvisvar. Svo kom stórsigur gegn Eistlandi heima og naumt 2-1 tap gegn Frakklandi áður en þeir gerðu jafntefli við Frakka á dögunum og voru óheppnir að vinna ekki.

Hvað þarf Ísland að gera?
Þessir tveir fyrstu leikir sitja væntanlega í mönnum en það þýðir ekkert að hugsa um það núna. Það eina sem dugar fyrir Ísland er að vinna síðustu tvo leikina og treysta á að Frakkar taki allavega stig af Sviss í lokaumferðinni.

Ef það gerist, þá er ljóst að Ísland fer í umspil um sæti í lokakeppninni sem fer fram í Albaníu og Serbíu á næsta ári.

Leikur Íslands og Sviss hefst klukkan 15:00 á morgun. Þar dugir ekkert annað en sigur.