Fótbolti.net spáir Keflavík 10. sæti en liðinu var spáð falli á kynningarfundi Bestu deilarinnar í gær.
Leikmannahópurinn er mikið breyttur frá síðasta sumri þar sem Keflavík endaði í 7. sæti en sjö byrjunarliðsmenn frá því síðasta sumar hafa horfið á braut í vetur.
Liðið hefur bætt við sig nokkrum leikmönnum í vetur en Stefan Ljubicic er á leiðinni frá KR og úkraínski miðvörðurinn Oleksiy Kovtun er einnig við það að skrifa undir hjá félaginu.
„Við erum alltaf að skoða í kringum okkur. Bæði geta einhverjir leikmenn farið og einhverjir komið í staðinn. Við erum stöðugt að vinna í því að styrkja hópinn okkar, hann er mjög breyttur frá því í fyrra, kannski breiðari. Það eru fleiri ungir og efnilegir leikmenn sem við væntum mikils af í sumar og þurfa að stíga upp," sagði Sigurður Ragnar þegar Fótbolti.net spjallaði við hann í gær.
Hann vonast til að geta haldið betur í sína bestu leikmenn í framtíðinni.
„Það er planið hjá okkur að halda betur í okkar bestu leikmenn í framtíðinni. Til þess þarf félagið að stækka utanvallar, við erum að vinna í því að fá góða styrktaraðila með okkur í það og þá getum við haldið betur í þessa efnilegu leikmenn sem við höfum í dag og vonandi skara framúr í sumar."
