Afena-Gyan til Cremonese (Staðfest) - Ný sóknarlína frá Nígeríu

Félagið var að staðfesta komu Felix Afena-Gyan frá Roma fyrir 7 milljónir evra en hann er átjándi leikmaðurinn til að ganga til liðs við félagið í sumar.

Jose Mourinho notaði Afena-Gyan á síðustu leiktíð en Rómverjar eru búnir að krækja í Paulo Dybala og Andrea Belotti í sumar svo félagið hefur ekki þörf fyrir ungstirnið lengur. Afena-Gyan, landsliðsmaður Gana, er aðeins 19 ára gamall og skoraði tvö mörk í 22 leikjum á síðustu leiktíð.

Cremonese borgaði metfé fyrir nígeríska framherjann David Okereke, sem skoraði 7 mörk í 32 leikjum á láni hjá Venezia á síðustu leiktíð. Hann er 24 ára gamall, kemur úr herbúðum Club Brugge og kostar 10 milljónir evra.

Sóknarmaðurinn Cyriel Dessers, sem er samlandi Okereke, er einnig kominn úr belgíska boltanum, frá Gent og kostar 8 milljónir evra. Hann skoraði 20 mörk í 41 leik á láni hjá Feyenoord á síðustu leiktíð.

Þá er miðjumaðurinn Charles Pickel kominn frá Famalicao fyrir 6 milljónir evra ásamt Argentínumönnunum Santiago Ascacíbar og Gonzalo Escalante sem eru á lánssamningum frá Hertha Berlin og Lazio.

Paolo Ghiglione og Johan Vasquez eru komnir frá Genoa, Leonardo Sernicola og Vlad Chiriches frá Sassuolo og að lokum eru varnarmennirnir Luka Locoshvili, Emanuel Aiwu og Giacomo Quagliata einnig komnir auk fleiri smærri spámanna.

Það verður afar áhugavert að sjá hversu snöggir þessir leikmenn eru að ná saman og hvort þeim takist að bjarga Cremonese frá falli. LIðið er án stiga eftir þrjár umferðir en allir leikirnir töpuðust naumlega, með aðeins eins marks mun.