Fyrrum landsliðsmaður Argentínu, Eduardo Berizzo, er tekinn við þjálfarataumunum hjá landsliði Síle sem hefur verið í lægð undanfarin ár.
Berizzo er 52 ára gamall og var síðast við stjórnvölinn hjá Paragvæ. Þar áður stýrði hann Athletic Bilbao, Sevilla og Celta Vigo í spænska boltanum.
Berizzo tekur við af Úrúgvæanum Martin Lasarte sem mistókst að koma Síle á lokamót HM í apríl.
Síle á þó enn möguleika á að komast á lokamótið í Katar. Það fer eftir rannsókn FIFA á því hvort Kólumbíumaður hafi spilað sem ólöglegur landsliðsmaður Ekvador og hvaða refsingu FIFA ákveður að beita ef ásakanirnar reynast sannar.
Það eru erfið kynslóðaskipti í gangi hjá Síle þar sem menn á borð við Alexis Sanchez, Arturo Vidal, Gary Medel, Mauricio Isla og Eduardo Vargas eru komnir vel yfir þrítugt og enn að spila fyrir landsliðið.