Haukar komu sér í kvöld í úrslit B-deildar Lengjubikarsins með því að vinna magnaðan 3-1 endurkomusigur á KFA á Dalvíkurvelli.

KFA spilaði manni færri allan síðari hálfleikinn. Heiðar Snær Ragnarsson sá rautt undir lok fyrri hálfleiks en þrátt fyrir liðsmuninn tókst Tómasi Atla Björgvinssyni að koma Austfirðingum í forystu.

LIðið náði að halda út í rúman hálftíma áður en allt hrundi. Daði Snær Ingason jafnaði á 80. mínútu og tæpri mínútu síðar kom Finnbogi Laxdal Aðalgeirsson Haukum í 2-1.

Ernest Slupski sá síðan til þess að gulltryggja sætið í úrslitaleikinn með marki á 85. mínútu. Frábær fimm mínútna kafli hjá Haukum sem mæta Þrótti Vogum í úrslitum næstu helgi.