Frank vonsvikinn: Sé ekkert jákvætt við frammistöðuna

Chelsea jafnaði Tottenham á stigum með þessum sigri. Nágrannarnir deila fjórða sæti deildarinnar, með 17 stig eftir 10 umferðir.

„Chelsea var betra liðið í dag, það leikur enginn vafi á því. Strákarnir lögðu mikið á sig en frammistaðan var samt ekki góð. Orkustigið í liðinu var ekki nægilega hátt og það vantaði alla ákefð. Þetta var slæmur dagur fyrir okkur," sagði Frank.

„Við gerðum svo mikið af einföldum mistökum í sendingum og töpuðum boltanum alltof oft. Það er margt sem spilar inn í en strákarnir voru ekki nægilega ferskir. Það gekk ekkert upp hjá okkur, sama hvað við reyndum."

Bæði Tottenham og Chelsea hafa spilað 5 leiki á tveimur vikum frá síðasta landsleikjahléi. Þau eiga bæði tvo leiki í næstu viku áður en síðasta landsleikjahlé ársins ber að garði.

„Í fljótu bragði get ég ekki séð neitt jákvætt við frammistöðuna í dag. Við munum fara ítarlega yfir leikinn á næstu dögum."

Tottenham á heimaleiki gegn FC Kaupmannahöfn og Manchester United á næstu sjö dögum.