Spá Fótbolta.net - 8. sæti: Fram

Spáin:
1. ?
2. ?
3. ?
4. ?
5. ?
6. ?
7. ?
8. Fram, 60 stig
9. ÍA, 59 stig
10. Vestri, 34 stig
11. Fylkir, 24 stig
12. HK, 14 stig

Um liðið: Fram er núna á leið inn í sitt þriðja tímabil í röð í Bestu deildinni en það hefur verið mikill uppgangur í félaginu síðustu ár. Fram er loksins komið með almennilega aðstöðu, eina þá bestu á landinu, og efniviðurinn er spennandi. Tímabilið í fyrra var þó erfitt og það gekk mikið á, en liðið hélt sér á endanum uppi. Það gerðust áhugaverðir hlutir í vetur sem valda því að ástæða er til bjartsýni í Dal draumanna fyrir komandi leiktíð.

Þjálfarinn: Það stærsta sem gerðist í vetur var það að Rúnar Kristinsson tók við þjálfun Fram og er Helgi Sigurðsson, sem raðaði inn mörkum fyrir félagið á sínum tíma, honum til aðstoðar. Rúnar lét af störfum hjá KR eftir síðasta tímabil en hann hafði stýrt KR síðan haustið 2017 og varð liðið Íslandsmeistari undir hans stjórn árið 2019. Hann hafði áður stýrt liðinu á árunum 2010-2014 og varð liðið þá Íslandsmeistari í tvígang og bikarmeistari í þrígang. Einhver mesta KR-goðsögn sögunnar reynir núna fyrir sér hjá Fram og verður afar spennandi að sjá hvernig það gengur upp.

Fótbolti.net fær sérfræðingana Einar Guðnason og Harald Árna Hróðmarsson til að rýna í styrkleika, veikleika og annað hjá liðunum sem spila í Bestu deildinni í sumar. Haraldur, sem er fyrrum aðstoðarþjálfari ÍA og Vals, fer yfir það helsta hjá Fram.

Styrkleikar: Fram mun alltaf skapa sér færi með Fred og Tiago í sínu liði. Framherjar liðsins eru sterkir og eftir frábæra tíma með Jóni Sveinssyni hefur Fram náð í einn öflugasta þjálfara landsins í Rúnari Kristinssyni. Brynjar Gauti og Kyle gætu fyllt í holurnar í varnarleiknum.

Veikleikar: Ekkert lið fékk fleiri mörk á sig á síðasta tímabili og hugarfar liðsins þarf að breytast þegar kemur að varnarleik. Liðið er of sveiflukennt og lykilmenn þurfa að vera í betra líkamlegu formi en á síðasta tímabili.

Lykilmenn: Fred Saraiva verður að spila vel og skapa færin fyrir Framara. Kennie Chopart er vanur að spila fyrir Rúnar og er ennþá einn albesti bakvörður deildarinnar. Jannik Pohl er vinnusamur og duglegur að refsa fyrir mistök andstæðingana.

Leikmaður sem á að fylgjast með: Breki Baldursson er einn af mörgum spennandi ungum leikmönnum Fram sem vert er að fylgjast með

Komnir:
Alex Freyr Elísson frá Breiðabliki (var á láni hjá KA)
Kyle McLagan frá Víkingir R.
Kennie Chopart frá KR
Þorri Stefán Þorbjörnsson á láni frá Lyngby
Freyr Sigurðsson frá Sindra
Víðir Freyr Ívarsson frá HK (var á láni hjá H/H)
Stefán Þór Hannesson frá Ægi (var á láni)

Farnir:
Aron Jóhannsson í Aftureldingu
Delphin Tshiembe til Danmerkur
Ion Perello til Grindavíkur
Þórir Guðjónsson
Viktor Bjarki Daðason til FCK (1. júlí)

Dómur Haraldar fyrir gluggann: 6/10. Það er vont fyrir Fram að missa Aron en áherslan var greinilega að styrkja varnarleikinn sem virðist hafa tekist. Þrír sterkir varnarmenn sem hjálpa Brynjari Gauta og eru einum miðjumanni frá að fá 8 í einkunn.

Leikmannalisti:
1. Ólafur Íshólm Ólafsson (m)
12. Stefán Þór Hannesson (m)
34. Benjamín Jónsson (m)
36. Þorsteinn Örn Kjartansson (m)
2. Brynjar Gauti Guðjónsson
3. Þorri Stefán Þorbjörnsson
4. Orri Sigurjónsson
5. Kyle McLagan
6. Tryggvi Snær Geirsson
7. Guðmundur Magnússon
9. Kennie Chopart
10. Frederico Bello Saraiva
11. Magnús Ingi Þórðarson
14. Hlynur Atli Magnússon
15. Breki Baldursson
16. Viktor Bjarki Daðason
17. Adam Örn Arnarson
18. Anton Ari Bjarkason
19. Víðir Freyr Ívarsson
20. Egill Otti Vilhjálmsson
22. Óskar Jónsson
23. Már Ægisson
25. Freyr Sigurðsson
26. Aron Kári Aðalsteinsson
27. Sigfús Árni Guðmundsson
28. Tiago Manuel Da Silva Fernandes
29. Mikael Trausti Viðarsson
31. Þengill Orrason
32. Aron Snær Ingason
33. Markús Páll Ellertsson
79. Jannik Pohl



Fyrstu fimm leikir Fram:
7. apríl, Fram - Vestri (Lambhagavöllurinn)
15. apríl, Fram - Víkingur R. (Lambhagavöllurinn)
20. apríl, KR - Fram (Meistaravellir)
29. apríl, Valur - Fram (N1-völlurinn Hlíðarenda)
5. maí, Fram - Fylkir (Lambhagavöllurinn)

Í besta og versta falli: Í besta falli verður Fram í baráttu um sæti í efri hlutanum og varnarleikur liðsins skilar þeim stigum þegar sóknin klikkar. Í versta falli verður Fram í 8.-9. sæti langt frá efri hlutanum og þarf að kíkja niður fyrir sig.

Spámennirnir: Aksentije Milisic, Anton Freyr Jónsson, Arnar Laufdal, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Tómas Þór Þórðarson og Valur Gunnarsson.