Óskar Hrafn Þorvaldsson þjálfari KR svaraði spurningum eftir tap í Þjóðhátíðarleiknum í Vestmannaeyjum í dag.
Lestu um leikinn: ÍBV 2 - 1 KR
ÍBV vann leikinn 2-1 með dramatísku sigurmarki á lokamínútunum, en Óskar telur sína menn ekki hafa verið nægilega góða til að verðskulda neitt annað en tap í Eyjum.
„Við fengum það sem við áttum skilið. Ég hef stundum staðið hérna eftir leik og verið með tilfinninguna að við höfum ekki fengið það sem við höfum átt skilið, en í þetta skiptið vorum við ekki nógu góðir. Við gerðum ekki nóg. Við vorum kærulausir með boltann og spiluðum upp í hendurnar á þeim, það er erfitt að tapa boltanum á slæmum stöðum gegn liði eins og ÍBV sem er með feykilega fljóta leikmenn," sagði Óskar, sem var miklu ánægðari með fyrri hálfleikinn heldur en þann seinni.
„ÍBV átti sigurinn skilið. Þeir voru minna með boltann og áttu færri sendingar og allt það en þeir tóku það sem við gáfum þeim og nýttu það vel. Þeir hefðu getað verið búnir að skora fyrr. Þetta var sanngjarnt hérna í dag. Það vantaði orku í okkur og betri ákvarðanatöku."
Tryggvi Guðmundsson spjallaði við Óskar Hrafn að leikslokum en þeir voru liðsfélagar í KR á tíunda áratuginum og ræddu um slæma stöðu KR á töflunni.
„Auðvitað er það sárt enda geri ég ekki mikið af því að líta á töfluna þessi dægrin. Það er mikilvægt fyrir okkur að vera staðfastir, ég þarf að vera staðfastur á því að þetta er langtímaverkefni. Það eru engar skyndilausnir, þú getur ekki stytt þér leið. Þannig er það bara. Það veldur mér meiri áhyggjum hversu döpur frammistaðan var heldur en að við töpuðum leiknum."
KR er afar óvænt í fallbaráttu sem stendur, í næstneðsta sæti með 17 stig eftir 17 umferðir. Hvað finnst Óskari um tilhugsunina að fara mögulega niður í Lengjudeild?
„Ég held það sé röng nálgun að hugsa þetta út frá verstu mögulegu útkomu. Við erum ekkert of góðir frekar en önnur lið til að falla um deild. Ef það er það sem þarf til að vekja okkur þá verðum við bara að vera menn til að taka því, en ég get ekki gengið um bæinn ef ég vakna á morgnana hræddur við að fara niður í Lengjudeildina.
„Við verðum að vera jákvæðir og hugsa frekar um bestu mögulegu útkomuna heldur en þá verstu."
