Félagarnir
Ísak Bergmann Jóhannesson og Hákon Arnar Haraldsson voru saman á miðjunni hjá FC Kaupmannahöfn í Íslendingaslag í dönsku deildinni í dag.
Liðið mætti Silkeborg en Stefán Teitur Þórðarson lék allan leikinn fyrir Silkeborg.
Þetta var fyrsti leikurinn í 8. umferð, tímabilið hefur farið illa af stað hjá meisturunum í FCK en liðið var með 9 stig eftir fyrstu sjö leikina.
Eina mark leiksins leit dagsins ljós undir lok fyrri hálfleiks þegar Victor Claesson skoraði fyrir FCK. Liðið er því komið með 12 stig og situr í 5. sæti eins og staðan er núna, stigi á eftir Silkeborg sem situr í 3. sæti.
Hákon var tekinn útaf í hálfleik en Ísak spilaði 80. mínútur.
Athugasemdir
