Jón Þór: Eins og beljur á svelli í upphafi leiks

„Mér fannst við bara taka öll völd á vellinum hér í seinni hálfleik eftir fyrri hálfleik sem var frekar kaotískur og fram og til baka. Eins og við vissum að FH-ingar koma af miklum krafti og orku inn í leikinn. Fyrir þennan leik, þrír leikir án taps hjá þeim og búnir að stoppa ákveðna blæðingu sem hefur verið hér í sumar. Við vissum það alveg að við þurftum að taka fast á þeim, og okkur tókst það ekki alveg hér í byrjun leiks. En tökum svo öll völd á leiknum í seinni hálfleik, og með ólíkindum að við höfum ekki farið með þrjú stig hérna sem við áttum svo sannarlega skilið," sagði Jón.

FH-ingar byrjuðu leikinn vel og skoruðu snemma, að sama skapi var byrjun Stjörnunnar ekki góð.

„Mér fannst við bara vera í bölvuðu brasi með að fóta okkur. Fyrsta snerting á bolta léleg, sendingar oft á tíðum ekki góðar þegar við vinnum boltann. Fljótir að tapa honum aftur á þessum fyrsta tíu mínútna kafla. Mér fannst við bara vera eins og beljur á svelli hérna í upphafi leiks, og náðum ekki tökum á því. En ég er gríðarlega ánægður með seinni hálfleikinn, við sköpum okkur urmul færa og með ólíkindum að ná ekki að klára það," sagði Jón.

Viðtalið má sjá í heild sinni í spilaranum hér fyrir ofan.