Fótboltafréttamaðurinn Fabrizio Romano segir að brasilíski miðjumaðurinn Bruno Guimaraes sé búinn að skrifa undir nýjan samning við Newcastle sem bindur hann við félagið til 2028.
Í nýja samningnum er þó söluákvæði sem segir að Bruno sé falur fyrir um það bil 100 milljónir punda.
Bruno var eftirsóttur í sumar og meðal annars orðaður við Liverpool, Chelsea og Real Madrid, en varð að lokum eftir í Newcastle þar sem honum líður vel.
Ekki er tekið fram hvenær Newcastle ætlar sér að tilkynna samkomulagið, en það gæti gerst á næstu dögum.
Bruno er 25 ára gamall miðjumaður sem fór beint inn í byrjunarliðið hjá Newcastle eftir að félagið keypti hann frá Lyon í janúar í fyrra, þar sem hann hefur reynst algjör lykilmaður. Núverandi samningur hans gildir út júní 2026.
Athugasemdir
