„Í seinni hálfleik var bara annað liðið að keppa“

Þið eruð þremur mörkum yfir í hálfleik en missið þetta niður. Hver er þín sýn á leikinn?

„Þetta er eiginlega skólabókardæmi um það hvað mark rétt fyrir hálfleik getur gert. Við urðum kærulausar eftir mjög góðan fyrri hálfleik. Í seinni hálfleik var bara annað liðið að keppa að einhverju leyti og það er ekki nógu gott.“

Þið gerðuð tvær breytingar í hálfleik. Fannst þér þær hafa áhrif?

„Ég veit það svo sem ekki. Þær sem komu inn á stóðu sig vel. Þegar þjálfari færir mikið til í liðinu til að sjá ákveðna hluti getur leikurinn auðvitað breyst. Við vorum samt í góðri stöðu og markmiðið var alltaf að vinna leikinn.“

Þið voruð kannski ekki að spila upp á jafn mikið og Breiðablik, sem er í titilbaráttu. Hafði það áhrif?

„Já, mér fannst það sjást í seinni hálfleik. Ég held að leikurinn hefði kannski verið öðruvísi ef við hefðum verið í titilbaráttu við Breiðablik.“

Tvær umferðir eru eftir. Ætlið þið að breyta miklu?

„Við ætlum bara að halda áfram með það sem við höfum verið að gera. Markmiðið er að gera vel fyrir liðið og félagið, bæta okkur og gefa leikmönnum fleiri tækifæri.“