Steini um Fanneyju: Örugglega besta frumraun í sögunni

Þorsteinn Halldórsson landsliðsþjálfari var ánægður með liðið.

„Vinnslan í liðinu, það var dugnaður og menn lögðu mikið á sig. Auðvitað fengu þær alveg færi og allt það en við vorum inn í þessu allan tímann," sagði Steini.

„Fyrri hálfleikur var góður að mörgu leiti, smá vandræði í færslum. Seinni hálfleikur vorum við ekki að verjast fyrirgjöfum nógu vel á köflum en Fanney var stórkostleg í markinu."

Fanney Inga Birkisdóttir var stórkostleg í sínum fyrsta landsleik en Steini hrósaði henni í hástert.

„Þetta var frábært, örugglega besta frumraun hjá leikmanni í sögunni, hún var stórkostleg. Við vorum búin að ákveða það fyrirfram að hún myndi byrja þennan leik þó að Telma hefði verið heil, við vorum örugg í riðlinum svo hún hefði alltaf byrjað þennan leik. Vildum sýna henni traust og ég held að hún hafi staðið undir því," sagði Steini og brosti.