Ítalía: Kean með tvennu í sigri á Inter - Albert veikur

Fiorentina og Inter áttust við í ítölsku deildinni í kvöld en um frestaðan leik var að ræða. Leikurinn fór upphaflega fram 1. desember en hann var flautaður af eftir 16 mínútur þegar Edoardo Bove, leikmaður Fiorentina, hneig niður.

Leikurinn í kvöld hófst á 16. mínútu. Albert Guðmundsson var ekki með Fiorentina í kvöld vegna veikinda.

Luca Ranieri skoraði sitt fyrsta mark á tímabilinu eftir klukkutíma leik þegar hann átti viðstöðulaust skot eftir fyrirgjöf úr hornspyrnu. Moise Kean bætti öðru markinu við stuttu síðar þegar hann skallaði boltann í netið.

Kean bætti síðan við sínu öðru marki og þriðja marki Fiorentina undir lokin þegar hann komst inn í slæma sendingu til baka. Yan Sommer, markvörður Inter, var kominn langt út úr markinu og Kean renndi boltanum framhjá honum af löngu færi.

Inter mistókst að jafna topplið Napoli að stigum en Fiorentina stökk upp úr 6. sæti í það fjórða en liðið er með jafn mörg stig og Lazio sem er í sætinu fyrir neðan.