Spánn: Valladolid með lífsnauðsynlegan sigur

Fyrsti leikur dagsins í La Liga deildinni á Spán var viðureign Real Valladolid og Getafe.

Bæði lið eru neðarlega á töflunni en Valladolid er þó í bullandi fallbaráttu og þurfti liðið því nauðsynlega á sigri að halda í dag.

Heimamenn byrjuðu miklu betur og komust í tveggja marka forystu á 24. mínútu leiksins. Oscar Plano og Shon Weissman gerðu mörkin fyrir Valladolid.

Jaime Mata minnkaði muninn fyrir Getafe á 37. mínútu og var staðan 2-1 í hálfleik. Fleiri mörk voru ekki skoruð í leiknum en markaskorari Getafe fékk hins vegar rautt spjald þegar fimm mínútur voru til leiksloka.

Lífsnauðsynlegur sigur hjá Valladolid, sem er núna þremur stigum frá fallsæti sem stendur.