Aðalsteinn Jóhann Friðriksson, þjálfari Þórs/KA, ræddi við Fótbolta.net eftir 2-2 jafntefli liðsins gegn Stjörnunni í dag. Stjarnan var með tveggja marka forystu í hálfleik eftir tvö mörk beint úr hornspyrnu frá Andreu Mist Pálsdóttur.
Lestu um leikinn: Þór/KA 2 - 2 Stjarnan
„Við vorum mjög daprar í fyrri hálfleik. Það skorti allt hugrekki á boltanum og þær ofan á í eiginlega öllu. Að sama skapi skora þær tvö skítamörk eftir horn," sagði Alli Jói.
„Það var allt annað að sjá okkur í seinni hálfleik. Við höfðum engu að tapa en að sama skapi spiluðum við gríðarlega vel og vorum að skapa ursla. Ég veit að þegar við köstum öllu fram þá hefði Stjarnan mögulega getað klárað leikinn. Úr því sem komið var er ég gríðarlega ánægður að hafa komið til baka og sótt þetta stig."
Alli var spurður að því hvort hann ætti hálfleiksræðuna á upptöku.
„Ég á ekkert í henni. Það eru bara leikmenn og við sem ræddum saman og fórum yfir þetta. Þetta er ekki eins og við í Þór/KA viljum gera hlutina. Það er alls ekki eitthvað sem þjálfarinn sagði sem breytti hlutunum," sagði Alli Jói.
