Jói Kalli: Veikir menn að spila leikinn

FH hefur verið á fínu skriði í deildinni og hafði einungis tapað einum leik í deildinni síðan í maí, og það tap var gegn toppliði Víkingi. Er þetta versta frammistaðan síðan í maí?

„Já, allavega þessi seinni hálfleikur, hann hlýtur að vera það. Afsökun eða ekki, við erum búnir því miður að glíma við veikindi í vikunni, menn eru slappir og orkulitlir að einhverju leyti vegna þess. Engar afsakanir samt, við tökum þetta á okkur, saman vorum við ekki. Við ætlum að skilja þessa frammistöðu eftir hér, ég lofa því að það verður ekki framhald af þessu. Við ræddum málin eftir leik og þetta er ekki sem við sættum okkur við."

Oliver Stefánsson var ekki með vegna veikinda. Er einhver sem spilaði í dag veikur?

„Já, ég held að nokkrir þarna séu svolítið slappir. Það skiptir máli upp á orkustigið, menn þurfa að vera 100% klárir. Þórsarar voru mjög agressífir og gerðu þetta vel. Það verður líka að hrósa þeim. En við áttum ekki góðan dag."

Var eitthvað smit í klefanum?

„Nei, eru ekki bara þessar pestir farnar að koma og við að glíma við einhverjar tegundir af þeim. Stundum kemur svona högg og ég held að við höfum aðeins fundið fyrir því," sagði Jói Kalli.

Hann ræddi um fallbaráttuna sem framundan er í lok viðtals sem má horfa á í spilaranum efst.