England: Boltinn vildi ekki inn á The Hawthorns

Fyrsta leik dagsins í ensku úrvalsdeildinni er lokið en þar var um alvöru fallbaráttuslag að ræða. WBA og Newcastle mættust þá á The Hawthorns.

Gestirnir frá Newcastle byrjuðu betur og komust í nokkur hálffæri í upphafi leiks. Eftir því sem leið á leikinn vann WBA sig þó vel inn í leikinn og átti svo sannarlega sín færi.

Uppskriftin var svipuð í síðari hálfleik. Liðin skiptust á að sækja og mátti sjá að það var mikið undir í þessum leik. Markmenn beggja liða þurftu að taka á honum stóra sínum í þessum leik og stóðu sig vel.

Inn vildi boltinn hins vegar ekki og því varð niðurstaðan markalaus jafntefli í þessum leik. Slæm úrslit fyrir WBA en liðið er núna átta stigum á eftir Brighton sem er í 17. sæti deildarinnar. Brighton á einn leik til góða á WBA.

Newcastle er í 16. sæti með 27 stig.