Sheffield United er að styrkja leikmannahópinn fyrir komandi átök í Championship deildinni.
Liðinu mistókst að komast aftur upp í úrvalsdeildina en það mátti litlu muna. Sheffield komst í umspilið og tapaði þar fyrir Nottingham Forest í vítaspyrnukeppni.
Núna er Tommy Doyle kominn á eins árs lánssamningi frá Manchester City. Doyle er tvítugur miðjumaður sem lék á láni hjá Hamburger SV og Cardiff City á síðustu leiktíð.
Hann fékk ekki mikið af tækifærum í þýsku B-deildinni en komst í liðið hjá Cardiff og stóð sig með prýði.
Þá er bosníski miðvörðurinn Abel Ahmedhodzic kominn frá Malmö fyrir óuppgefna upphæð sem Sky Sports telur vera 3 milljónir punda. Við þá tölu geta bæst við tvær milljónir í árangurstengdum greiðslum.
Ahmedhodzic er fastamaður í landsliði Bosníu og gerði góða hluti á láni hjá Bordeaux á síðustu leiktíð.
Bordeaux reyndi að kaupa Ahmedhodzic í sumar en gat ekki borgað jafn mikið fyrir varnarmanninn og Sheffield.