Formaður Vals kveður sögusagnir í kútinn - „Veit ekki hvaða þvæla það er"

„Það er ekki rétt. Það hefur ekki verið tekin nein ákvörðun með Chris og það var skilið eftir þannig að við ætluðum að ræða saman í lok tímabils. Varðandi Vigni þá er hann að hugsa sér til hreyfings, það væri þá hans ákvörðun. Síðan hefur Emil (markmannsþjálfara) verið tilkynnt að hann verði ekki áfram," segir Styrmir.

Gareth Owen er yfirmaður fótboltamála hjá Val. Er ljóst að hann verður áfram?

„Hann er starfsmaður félagsins, ég sá umfjöllunina hjá ykkur (á Fótbolta.net), veit ekki hvaða þvæla það er. Að öllu óbreyttu verður hann áfram," segir Styrmir sem staðfestir að styrktarþjálfarinn Kirian Elvira Acosta verði áfram hjá félaginu.

Er búið að taka einhverja ákvörðun hverjir verða með Dóra í hans þjálfarateymi?

„Nei, það eru einhver nöfn á blaði en það er ekki búið að ganga frá neinum ráðningum, ekkert frágengið," segir Styrmir.

Halldór Árnason mun taka við sem þjálfari Vals eftir tímabilið en það varð ljóst í júní þegar Hermann Hreiðarsson var látinn fara. Chris, sem var aðstoðarmaður Hermanns, hefur stýrt liðinu frá þeim tímapunkti.