Íslendingaliðið tapaði niður þriggja marka forystu í leik sem lauk þremur dögum eftir að hann hófst

Síðustu 25 mínúturnar í leik Utrecht og Go Ahead Eagles í hollensku úrvalsdeildinni voru spilaðar í dag en leikurinn var stöðvaður á laugardag vegna óláta áhorfenda sem köstuðu flugeldum út á völlinn.

Alfons Sampsted og Stefán Ingi Sigurðarson voru í byrjunarliði arnanna sem komust 3-0 yfir á laugardaginn. Leikurinn var stöðvaður tímabundið eftir það en hófst svo að nýju stuttu seinna og tókst Utrecht að minnka muninn áður en ákveðið var að hætta leik.

Ákveðið var að klára leikinn í dag bak við luktar dyr og spilaðar voru síðustu 25 mínúturnar auk uppbótartímans.