Spá Fótbolta.net fyrir Bestu kvenna: 5. sæti

Spáin:
1. ?
2. ?
3. ?
4. ?
5. Þór/KA, 67 stig
6. Stjarnan, 48 stig
7. FH, 47 stig
8. Fram, 25 stig
9. FHL, 19 stig
10. Tindastóll, 16 stig

Um liðið: Þór/KA var þriðja besta lið Bestu deildarinnar lengi vel á síðustu leiktíð en enduðu á grátlegan hátt með því að missa það sæti í síðustu umferðinni í hendur Víkinga. Það var leikur sem leikmenn Þórs/KA vilja gleyma. Þriðja sætið gefur í rauninni ekki neitt en samt var þetta mjög sárt fyrir liðið. Þór/KA var nánast allt mótið í fyrra í þriðja sæti en þær komust aldrei nálægt efstu tveimur liðunum; þær misstu þau langt fram úr sér þegar leið á mótið. Markmiðið í ár er eflaust að færast nær þessum liðum og reyna kannski að búa til einhverja baráttu um að komast á meðal efstu tveggja liðanna þetta sumarið.

Þjálfarinn: Jóhann Kristinn Gunnarsson er á leið inn í sitt þriðja tímabil sem þjálfari Þórs/KA eftir að hafa tekið aftur við stjórn liðsins. Hann stýrði karlaliði Völsungs í mörg ár við góðan orðstír áður en hann tók svo aftur við Þór/KA. Jóhann Kristinn þekkir vel til hjá félaginu, en hann tók fyrst við liðinu árið 2011 og gerði það að Íslandsmeistara ári síðar. Þá kom hann liðinu í úrslit bikarsins árið 2013. Það er mikill fengur fyrir Þór/KA að hafa fengið Jóhann Kristin aftur og er mikil ánægja með hans störf á Akureyri, þá kannski sérstaklega innan leikmannahópsins.

Álit Magga
Magnús Haukur Harðarson, fyrrum þjálfari Fjölnis, er sérfræðingur Fótbolta.net í Bestu deild kvenna. Hann rýnir í öll liðin fyrir tímabilið sem er framundan.
Norðurlandið þarf að vakna
„Eftir sterka byrjun á síðasta tímabili þar sem liðið var í toppbaráttu í fyrri umferðinni en í þeirri seinni fjaraði tímabilið út hægt og rólega nema auðvitað hjá Söndru Maríu sem var stórkostleg allt tímabilið."

„Það hefur verið lítil endurnýjun á leikmannahópnum en oftast er það jákvætt en eins og sé þetta hefði þurft meira til að taka næsta skref og berjast um efstu sætin. Það er erfitt að fá íslenska leikmenn norður (sem ég skil ekki) og voru erlendir leikmenn liðsins á síðasta tímabili mikil vonbrigði."

„Heimavöllurinn verður að vera sterkari en hann var í fyrra og liðið þarf að vera meira „direct“ á vellinum einnig skora ég á þjálfara liðsins að vera aðeins léttari í viðtölum. Þær eru með besta leikmann deildarinnar í sínu liði og hún á skilið meiri aðstoð frá liðsfélögum og hef ég fulla trú á að það gerist í ár."

„Norðurlandið þarf að vakna, mæta á völlinn og þá gerast góðir hlutir."

Lykilmenn: Margrét Árnadóttir og Sandra María Jessen
Í liði Þór/KA er mögulega besti leikmaður Bestu deildarinnar: Sandra María Jessen. Hún var allavega valin sú besta í deildinni í fyrra en hún var stórkostleg síðasta sumar og skoraði þá 22 mörk í 23 leikjum. Hún endaði markahæst í deildinni. Mikilvægi hennar fyrir Þór/KA er gígantískt. Margrét er þá máttarstólpur í liði Þórs/KA inn á miðsvæðinu en hún spilaði nánast allar mínútur í fyrra. Margrét er margt í sínum leik en hún hefur spilað erlendis og er með mikla reynslu þrátt fyrir ungan aldur.

Gaman að fylgjast með: Bríet Fjóla Bjarnadóttir
Afar efnilegur leikmaður sem fékk eldskírn sína í Bestu deildinni aðeins þrettán ára gömul. Hún er fædd árið 2010 en spilaði þrátt fyrir það 14 leiki í Bestu deildinni í fyrra og má reikna með því að hún taki enn stærra hlutverk í liðinu í sumar. Leikmaður sem gæti náð langt í framtíðinni ef hún heldur rétt á spilunum.

Komnar:
Eva Rut Ásþórsdóttir frá Fylki
Jessica Berlin frá Írlandi

Farnar:
Ísfold Marý Sigtryggsdóttir í Víking
Bryndís Eiríksdóttir í Val (var á láni)
Lidija Kulis til S.a.f.
Lara Ivanusa til S.a.f.

Samningslausar:
Shelby Money (1997)
Eva S. Dolina-Sokolowska (2008)



Fyrstu fimm leikir Þórs/KA:
16. apríl, Víkingur R. - Þór/KA (Víkingsvöllur)
21. apríl, Þór/KA - Tindastóll (Boginn)
27. apríl, Valur - Þór/KA (N1-völlurinn Hlíðarenda)
3. maí, Þór/KA - FH (Boginn)
8. maí, FHL - Þór/KA (Fjarðabyggðarhöllin)

Spámennirnir: Alexandra Bía Sumarliðadóttir, Anton Freyr Jónsson, Brynjar Óli Ágústsson, Elíza Gígja Ómarsdóttir, Guðmundur Aðalsteinn Ásgeirsson, Mist Rúnarsdóttir, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke og Sölvi Haraldsson.