Þór/KA heimsótti ÍBV til Vestmannaeyja í Bestu deild kvenna í dag og tapaði 2-0.
Lestu um leikinn: ÍBV 2 - 0 Þór/KA
Aðalsteinn Jóhann Friðriksson þjálfari Þórs/KA svaraði spurningum eftir tapið.
„Það er mikið svekkelsi að tapa þessum leik sérstaklega miðað við hvernig seinni hálfleikurinn spilaðist," sagði Alli Jói en Guðný Geirsdóttir átti stórleik á milli stanga ÍBV.
„Þetta er ekki nógu góður leikur hjá okkur í heildina, það er lélegt hjá okkur að fá þessi mörk á okkur og ég er mest svekktur að við höfum ekki náð að skora í þessum seinni hálfleik."
Þór/KA er með tvö stig eftir fjórar fyrstu umferðir deildartímabilsins.
„Við teljum okkur vera með lið sem getur farið inn í hvern einasta leik til að vinna hann og markmiðið er að vera að berjast um hærra á töflunni. Okkur líður eins og við eigum inni einhver stig eftir þessa fyrstu leiki en í grunninn þá þurfum við bara að gera betur til að vinna fótboltaleiki."
