Jean Michael Seri kominn til Hull (Staðfest)


Mynd: Fulham


Mynd: Fulham
Miðjumaðurinn Jean Michaël Seri er búinn að skrifa undir þriggja ára samning við Hull City sem leikur í Championship deildinni.
Þessi miðjumaður, sem á 42 landsleiki að baki fyrir Fílabeinsströndina, var á sínum tíma orðaður við félög á borð við Barcelona og PSG en endaði á að skipta til Fulham.
Hann átti erfitt uppdráttar í enska boltanum og lék að lokum bara tvö tímabil með Fulham og var lánaður út til Galatasaray og Bordeaux hin tvö árin.
Seri, sem er 30 ára gamall, rann út á samningi um mánaðarmótin og hefur valið sér Hull sem næsta áfangastað.
Hann spilaði 34 leiki með Fulham er liðið vann Championship deildina og kom sér aftur upp í ensku úrvalsdeildina á síðustu leiktíð.
Seri hóf ferilinn með Pacos de Ferreira í Portúgal og var seldur til Nice fyrir eina milljón evra. Hann naut sín í franska boltanum en var svo seldur til Fulham fyrir 30 milljónir.
