Líkleg byrjunarlið úrslitaleiksins - Vindurinn á kantinum og Ívar áfram í kuldanum?

Líklegt byrjunarlið Breiðabliks
Við spáum því að Ólafur Ingi Skúlason, þjálfari Breiðabliks geri eina breytingu á byrjunarliði sínu frá 2-1 tapi liðsins gegn KA á Akureyri um síðustu helgi.

Búist er við að Höskuldur Gunnlaugsson snúi aftur í lið Breiðabliks á kostnað Gabríels Snæs Hallssonar. Höskuldur hefur verið að glíma við krónísk bakmeiðsli síðastliðið ár og hefur því aðeins byrjað ellefu leiki í Bestu deildinni hingað til.

Þá spáum við því að Ívar Örn Árnason verði áfram á bekknum en hann var ónotaður varamaður gegn KA. Ívar þekkir þó að úrslitaleiki Mjólkurbikarsins vel en hann fór í tvígang með KA á Laugardalsvöll og lyfti bikarmeistaratitlinum 2024.

Viktor Karl Einarsson er sá sem er hvað næst byrjunarliðinu, þá er Aron Bjarnason að snúa til baka eftir meiðsli og gæti verið kostur á kantinum.



Líklegt byrjunarlið Aftureldingar
Í liði Aftureldingar vantar einn þeirra hættulegasta mann, Elmar Kára Enesson Cogic, sem hefur verið mikið frá vegna meiðsla á tímabilinu.

Maðurinn sem hefur fyllt í hans skarð að undanförnu, Haukur Örn Brink, er tæpur vegna meiðsla og spáum við honum því á bekknum.

Þeir eru þó ekki með neinn aukvisa sem getur leyst þá báða af hólmi og við tippum því á að Birkir Már Sævarsson byrji á hægri kanti. Hann átti frábæran leik á kantinum gegn Stjörnunni í 8-liða úrslitum Mjólkurbikarsins, þar sem hann skoraði tvö mörk.

Kristinn Freyr Sigurðsson er sömuleiðis í líklegu byrjunarliði Mosfellinga og á hann möguleika á að vinna sinn þriðja bikarmeistaratitil.

Jón Vignir Pétursson er tæpur vegna meiðsla og spáum við því að hann byrji á bekknum. Sævar Atli Hugason er sá sem gerir sterkasta tilkallið að koma inn í byrjunarliðið.