Heimild: Höttur Facebook
Viðar Jónsson hefur verið ráðinn sem nýr þjálfari Hattar og er hann búinn að skrifa undir þriggja ára samning við félagið.
Viðar hefur stýrt Leikni Fáskrúðsfirði við góðan orðstýr undanfarin ár og mættust liðin í 2. deildinni í sumar. Aðeins eitt stig munaði á liðunum í fallbaráttunni er Höttur féll en Leiknir bjargaði sér í dramatískri lokaumferð.
Viðar fer því niður um deild til að taka við Hetti, en hann hóf ferilinn með Hetti og spilaði svo fyrir Leikni F. í tæpan áratug áður en hann lagði skóna á hilluna 2010.
Brynjar Árnason, fyrirliði Hattar, hefur verið ráðinn sem aðstoðarþjálfari Viðars.
„Það er með mikilli ánægju og gleði sem að stjórn Rekstrarfélags Hattar kynnir til sögunnar nýjan þjálfara meistaraflokks karla til næstu þriggja ára, Viðar Jónsson," segir í yfirlýsingu frá Hetti.
„Að mati stjórnar er Viðar einn mest spennandi þjálfari landsins og fengur fyrir félagið en hann hefur bæði UEFA A gráðu sem og hann hefur nýlokið gráðu í afreksþjálfun unglinga."
Athugasemdir
