Dæmdu mark af Brighton vegna mannlegra mistaka í VAR herberginu

Brighton tók forystuna í síðari hálfleik og tókst heimamönnum í London að jafna eftir slæm markmannsmistök Robert Sanchez.

Lokatölur urðu 1-1 en leikmenn, stjórnendur og stuðningsmenn Brighton fara svekktir heim vitandi að þeir hefðu átt að vinna leikinn með réttu.

Pervis Estupinan kom boltanum í netið í fyrri hálfleik þegar staðan var enn markalaus. Markið var upprunalega dæmt gilt en VAR herbergið skarst í leikinn og breytti dómnum yfir í rangstöðu.

John Brooks var í VAR herberginu og sá um að teikna rangstöðulínurnar en gerði mistök í marki Estupinan með því að teikna línuna frá röngum varnarmanni. 

Brooks teiknaði línuna frá James Tomkins, sem var þó ekki aftasti varnarmaðurinn. Marc Guehi var aftastur en Brooks tók ekki eftir því. Guehi hefði spilað Estupinan réttstæðan.

Þetta er ekki eina umdeilda atvikið úr leikjum dagsins því Mikel Arteta og stuðningsmenn Arsenal eru brjálaðir yfir jöfnunarmarki Brentford sem fékk að standa eftir nána athugun í VAR herberginu.

Fyrr í dag voru Chelsea menn æfir að fá ekki vítaspyrnu þegar Tomas Soucek skutlaði sér og varði boltann með hendi.