Keppinautur Andra Lucasar fer ekki fet

Andri er kominn með tíu mörk í ensku B-deildinni á tímabilinu en Lankshear hefur skorað þrettán fyrir Boro og er því þremur mörkum á undan Íslendingnum í baráttunni um markakóngstitilinn.

Íslenski landsliðsmaðurinn fékk ekki sérstaklega góðar fréttir í dag, en samkvæmt TeamTalk ætlar Middlesbrough ekki að hlusta á tilboð í Lankshear í janúar og stefnir því allt í að hann klári tímabilið hjá félaginu.

Þessi 21 árs gamli framherji kom til Boro frá Tottenham fyrir 20 milljónir punda í sumar og hefur farið á kostum síðan. Andri Lucas hefur þó sjálfur verið í frábæru formi og ætlar sér án efa að veita honum harða samkeppni um markakóngstitilinn.

Frammistaða Lankshear hefur ekki farið framhjá félögum í ensku úrvalsdeildinni, frekar en frammistaða Andra. Arsenal og Tottenham hafa fylgst með honum undanfarið, en Lankshear lék með unglingaliðum beggja félaga.

Manchester United, Brighton og Everton eru einnig sögð hafa áhuga á framherjanum, auk Newcastle United, Leeds og Sunderland.

Middlesbrough stefnir hins vegar á að tryggja sér sæti í ensku úrvalsdeildinni og ætlar því ekki að selja Lankshear í janúar, sama hvaða tilboð berast. Félagið mun síðan skoða stöðuna aftur að tímabilinu loknu.

Það stefnir því í áframhaldandi baráttu milli Andra og Lankshear um markakóngstitilinn, nema auðvitað að Andri sjálfur skipti um félag í janúar, en hann hefur einnig verið orðaður við nokkur úrvalsdeildarfélög.

Andri hélt frábæru formi sínu áfram með íslenska landsliðinu á föstudaginn þegar hann skoraði þrennu í 5-0 stórsigri á Búlgaríu. Hann fær svo tækifæri til að kóróna frábæran landsleikjaglugga gegn Lúxemborg á morgun, áður en alvaran tekur aftur við í enska boltanum.