3. deild: Björn Daníel á skotskónum í sigri Sindra

Björn Daníel Sverrisson, spilandi þjálfari Sindra, komst á blað þegar liðið vann mikilvægan 3-1 sigur á Ými í 3. deild karla í dag.

FH-ingurinn tók við Sindra undir lok síðasta árs og hefur leikið tíu deildarleiki samhliða þjálfarastarfinu í sumar.

Hann skoraði sitt fjórða mark á tímabilinu þegar hann kom Sindra yfir strax á þriðju mínútu. Abdul Bangura tvöfaldaði síðan forystuna úr vítaspyrnu undir lok fyrri hálfleiks.

Fredrick Delali fékk rautt spjald í liði Sindra á 78. mínútu og Þórður Carl Guðmundsson nýtti liðsmuninn átta mínútum síðar þegar hann minnkaði muninn í eitt mark.

Jóhann Frans Ólason slökkti þó vonir Ýmismanna undir lokin þegar hann skoraði þriðja mark Sindra og gulltryggði sigurinn.

Stigin voru gríðarlega mikilvæg fyrir Sindra sem er í næstneðsta sæti með 14 stig, aðeins einu stigi á eftir Ými sem situr í tíunda sæti.