Landsliðskonan Diljá Ýr Zomers segir íslenska landsliðið hafa fulla trú á því að mörkin fari að detta inn þegar liðið mætir Úkraínu í komandi heimaleik.
„Bara mjög vel. Gaman að fá að spila heima, báða leikina og fá loksins að spila á Laugardalsvelli. Fyrst og fremst að bara að fókusa á Úkraínu núna og vinna þann leik.“
Hún segir liðið hafa tekið jákvæða hluti með sér úr síðasta verkefni.
„Við höfum talað um það að vera kannski aðeins hugrakkari, við höfum sýnt það sérstaklega gegn Englandi, við áttum þarna kafla þar sem við náum að spila þær út. Við þurfum að halda áfram að gera það og gera meira af því, frá fyrstu mínútu en ekki bara þegar við komum seinna inn í leikina.“
Diljá segir leikinn gegn Úkraínu krefjast annars konar nálgunar.
„Þessi leikur verður allt öðruvísi en hinir leikirnir og við viljum stjórna leiknum meira. Þær eru mjög beinskeyttar, pressa hátt og vilja fara svolítið í löngu boltana. Þetta verður allt öðruvísi leikur og við þurfum bara að díla við það.“
Hún segir lykilatriði að leysa pressuna og nýta plássin sem skapast.
„Bara spila okkar bolta, fókusinn verður svolítið á að reyna að leysa þessa beinskeyttu pressu með einni sendingu fram á við. Fara í gegnum það og fá stór pláss og keyra á það.“
Diljá er bjartsýn á sóknarleikinn.
„Já við höfum verið að vinna í leiðunum sem við viljum fara á móti Úkraínu og vonandi tekst okkur bara að koma inn marki. Við þurfum að halda áfram að sækja og við sýndum alveg, við áttum skot í slá á móti Englandi, þannig mörkin liggja alveg í loftinu.“
Hún segir liðið einnig þurfa að nýta föstu leikatriðin betur.
„Að sama skapi þurfum við að nýta föstu leikatriðin okkar. Ég hef fulla trú á því að mörkin koma á þriðjudaginn!“
Að lokum leggur hún áherslu á mikilvægi þess að fá stuðning úr stúkunni.
„Mjög mikilvægt, það er einmitt það á Laugardalsvelli að maður finnur fyrir þessum aukakrafti í stúkunni og sérstaklega ef það eru fleiri heldur en færri, Vonandi sjáum við bara sem flesta.“
Sjáðu viðtalið í heild í spilaranum hér fyrir ofan.
