Fotbolti.net
12.07.22 - 19:40
Ívan Guðjón Baldursson
Ítalska deildin

Bologna fær nýjan Skota í hópinn (Staðfest)

Bologna fær nýjan Skota í hópinn (Staðfest)
Canon

Mynd: EPA

Skoski landsliðsmaðurinn Lewis Ferguson hefur valið að skipta yfir í ítölsku deildina til Bologna frekar heldur en í Championship deildina til Millwall.

Bologna borgar 3 milljónir punda fyrir Ferguson sem er 22 ára gamall miðjumaður og hefur verið algjör lykilmaður í liði Aberdeen undanfarin ár.

Ítalska félagið er nýlega búið að græða væna fúlgu fjárs á skoska bakverðinum Aaron Hickey, sem var keyptur til Brentford á dögunum, og vonast til að Ferguson verði jafn öflugur.

Ferguson skoraði 16 mörk í 44 leikjum á síðustu leiktíð og tímabilið þar á undan setti hann 10 mörk í 41 leik auk þess að gefa 5 stoðsendingar. 

Ferguson er markheppinn miðjumaður og á fjóra A-landsleiki að baki fyrir Skotland eftir að hafa verið lykilmaður í U21 og U19 liðunum.

Ferguson skrifar undir fjögurra ára samning við Bologna með möguleika á eins árs framlengingu.

Bologna endaði í 13. sæti ítölsku deildarinnar á síðustu leiktíð með 46 stig. 

Ferguson mun berjast við menn á borð við Jerdy Schouten og Mattias Svanberg um sæti í byrjunarliðinu.

Bologna fær nýjan Skota í hópinn (Staðfest)
Canon

Mynd: Getty Images

Slapp
Fotbolti.net

© Copyright 2002-2026 Fotbolti.net / Fotbolti Ehf. All rights reserved.