Mourinho fengið fleiri rauð spjöld en leikmenn deildarinnar
Mynd: EPA
Mynd: EPA
Jose Mourinho, þjálfari Roma á Ítalíu, fékk að líta á rauða spjaldið í miðri viku þegar Rómverjar lágu gegn Lazio í nágrannaslag í ítalska bikarnum.
Roma tapaði leiknum 1-0 en seint í leiknum fékk Mourinho rautt spjald fyrir að mótmæla kröftulega. Þetta var alls ekki hans fyrsta rauða spjald sem þjálfari liðsins.
Á síðustu tveimur tímabilum hefur Portúgalinn geðþekki fengið að líta á rauða spjaldið alls fimm sinnum og er það meira heldur en nokkur leikmaður deildarinnar á þessum tíma. Þá fékk Mourinho einnig rautt spjald og fjögurra leikja bann í Evrópudeildinni en hann fór mikinn eftir tap Roma gegn Sevilla í vítaspyrnukeppni í Búdapest í úrslitaleik Evrópudeildarinnar.
Ítalskir fjölmiðlar greina frá því að Mourinho sé orðinn valtur í sessi en ef illa fer gegn AC Milan í deildinni á morgun gæti félagið skipt um þjálfara.
