England í dag - Man Utd þarf sigur

Tottenham, sem lagði Manchester City 1-0 í síðasta leik á nýjum heimavelli, tekur þar á móti botnliði Huddersfield. Þetta verður þriðji leikur liðsins á nýjum heimavelli, en sá fyrsti var 2-0 sigur gegn Crystal Palace.

Svo er Íslendingaslagur á dagskrá þegar Burnley tekur á móti Cardiff. Jóhann Berg Guðmundsson og félagar eru búnir að vinna tvo í röð og eru komnir 8 stigum frá Aroni Einari Gunnarssyni og félögum sem eru í fallsæti og þurfa sigur.

Gylfi Þór Sigurðsson verður þá væntanlega í eldlínunni er Everton heimsækir Fulham, sem er þegar fallið úr deildinni rétt eins og Huddersfield. Everton er í góðu stuði þessa dagana og er búið að vinna þrjá leiki í röð.

Southampton tekur á móti Wolves og Brighton mætir Bournemouth áður en síðasti leikur dagsins verður flautaður á á Old Trafford.

Manchester United tekur þar á móti West Ham og þarf sigur í Meistaradeildarbaráttunni. Það verður ansi þung þraut að sigrast á Hömrunum þar sem Ole Gunnar Solskjær þarf að passa liðsvalið afar vel, enda mikilvægur leikur gegn Barcelona á dagskrá næsta þriðjudag.

Leikir dagsins:
11:30 Tottenham - Huddersfield (Stöð 2 Sport)
14:00 Brighton - Bournemouth
14:00 Burnley - Cardiff City
14:00 Fulham - Everton (Stöð 2 Sport)
14:00 Southampton - Wolves
16:30 Man Utd - West Ham (Stöð 2 Sport )