Mjólkurbikarinn: Afturelding með þægilegan sigur gegn Leikni

Lengjudeildarliðin Leiknir og Afturelding áttust við á Domusnovavellinum í dag í Mjólkurbikar karla en barist var um sæti í 32-liða úrslitunum.

Gestirnir úr Mosfellsbænum áttu ekki í neinum vandræðum með Leikni en þegar flautað var til leikhlés var liðið tveimur mörkum yfir. Mörkin gerðu þeir Sigurpáll Melberg Pálsson og Hrannar Snær Magnússon.

Elmar Kári var sjóðandi heitur á undirbúningstímabilinu og hann hélt áfram að skora í dag þegar hann gerði þriðja mark Aftureldingar áður en Róbert Hauksson minnkaði muninn fyrir Leikni.

Andri Freyr Jónasson sá um að setja síðasta naglann í kistu Leiknismanna og því öflugur 1-4 sigur staðreynd hjá Aftureldingu sem verður í pottinum á mánudaginn þegar dregið verður í 32 liða úrslitin.